Surat Valentin Untuk Mama
Kadang-kadang sa rasa sunyi
sekali, sa coba untuk bagikan kesunyian itu dengan sa pu teman-teman, tapi
tetap saja sa rasa sunyi. Orang-orang dong bilang masalah itu seperti beban,
kalo tong pikul sendiri pasti tong rasa berat skali, tapi kalo tong bagikan
pasti akan lebih ringan.
Waktu terus berlalu dan banyak
cerita juga yang sa baku bagi dengan sa pu teman-teman, ada cerita sedih yang
kadang bikin tong terharu dan menangis, ada juga cerita lucu yang susah untuk
tong lupakan, tapi tetap saja, jauh di dalam sa pu hati ni, sa pu rasa sunyi itu
tetap ada.
Sa coba untuk jadi orang baik,
dan selalu sa coba di setiap detik yang sa miliki di dunia ini, sa tra harap orang-orang dong balas sa punya kebaikan, sa hanya ingin dong sadar bahwa ditengah
kesukaran ini masih ada orang-orang yang baik.
Sering skali orang buat sa sakit
hati, marah, sedih dan kecewa, tapi trada yang bisa buat sa lupa semua kebaikan
yang sa pernah rasa, jadi sa putuskan untuk balas dong dengan kebaikan hati
yang tulus. Sa pernah punya satu orang, orang yang sayang sa tanpa syarat,
orang yang bisa buat sa rasa sangat berarti dalam de pu hidup tapi sayang Tuhan
panggil de supaya sa hanya tinggal sendiri deng Tuhan saja.
Sekarang hari valentine ma, semua
orang dong ada sama-sama dengan orang-orang yang dong sayang, sa juga ingin sama-sama
deng mama, sa mau ada sama-sama mama, sa mau mama tau kalo mama tuh sangat
berarti untuk sa dalam sa punya hidup, sa mau ucapkan terima kasih untuk setiap
detakan jantung yang sama, yang ketong dua punya waktu sa ada di dalam mama
punya perut, sa ingin datang dan peluk mama lagi, tapi sayang sa tra punya
kesempatan itu lagi.
Sekarang mama su tidur, mama tidur nyenyak skali, sa tra tahu bagaimana sa bisa kas bangun mama lagi. Kalo memang
satu-satunya cara untuk bisa ketemu mama tuh hanya di dalam mimpi, biar sudah......sa mimpi selama-lamanya supaya sa bisa sama-sama deng mama lagi.
Air kali tu masih mengalir ma,
tempat tong biasa cuci pakaian kotor. Biasa sa mandi-mandi disana, mama ada
cuci pakean. Kadang-kadang ma suruh sa duduk dan sa ingat kalo ma suruh sa
duduk, sa pasti akan duduk dan diam, waktu ma main voly juga, ma pasti bilang
sa duduk dan sa pasti akan duduk lihat mama kam main voly sampe selesai. Sa tra
pernah melawan mama. Sekarang mama tra perlu bilang sa duduk lagi, karena sa
berdiri ka! duduk ka! Mama tetap tra bisa bilang apa-apa lagi ke sa.
Sa tra bisa lihat ma lagi dan ma
tra bisa lihat sa lagi, tapi sa senang kalo sa lihat danau ma, di pinggir danau
itu tempat pertama yang ma lihat waktu mama lahir, di pinggir danau itu juga
tempat terakhir mama tutup mama punya mata, waktu sa lihat danau itu sa lihat mama ada
di sana.
Sebentar lagi sa akan pergi, sa
mau pergi untuk pilih jalan terbaik dalam sa punya hidup, dan akan ada banyak jalan skali dalam sa pu sisa hidup di dunia ini, tapi sa janji ma! Sa akan terus jadi anak baik dan sa akan rindu mama di
semua jalan kehidupan yang akan sa lalui.
Ma! Mama tunggu sa eh? Salam
untuk sa pu teman-teman yang su duluan sampe di sana. Bilang dorang, tolong jemput sa nanti
waktu sa sampe di depan pintu gerbang emas di kota itu, tolong bilang sama
Tuhan Yesus juga sa mau De juga ada dalam ketong punya foto keluarga nanti di sana.
Sampai nanti ma, sa sayang mama……
By Mund Galatiano